ഒരു മുള്ള് വാടാൻ വേണ്ട നേരം / oru mullu vadan വേണ്ട neram

ഒരു മുള്ള്

വാടാൻ വേണ്ട നേരം

--------------------------------

മധുശങ്കർ 

മരിച്ചുകഴിഞ്ഞ്

ഞാൻ ആദ്യം പോയത്

ഞങ്ങളാദ്യമിരുന്ന

പൂന്തോട്ടത്തിലാണ്... 

അവിടെ കാത്തുനിൽക്കുമെന്നാണ്

അവൾ പറഞ്ഞിരുന്നത്! 

പറ്റേ വാടിപ്പോയ പൂന്തോട്ടം 

നനയ്ക്കുന്ന ഒരു വൃദ്ധനെ

ഞാനവിടെ കണ്ടു !

കോരിച്ചൊരിയുന്ന ഈ മഴക്കാലത്ത്

നിങ്ങളെന്താണ് ചെയ്യുന്നത്? 

ഞാനയാളോട് ചോദിച്ചു. 

ഞാനൊരു പനിനീർച്ചെടിയെ

പറിച്ചുനടുകയാണ്... 

ശൂന്യമായ  തന്റെ ഹൃദയത്തിലേക്ക് 

അയാൾ  വിരൽ ചൂണ്ടി ! 

അയാൾ പറിച്ചുനട്ട 

പനിനീർച്ചെടിക്ക്

മുള്ളുകളില്ലായിരുന്നു!